باغی پاک

هەبی نەبی چە خودای گەورەتەر نەبی.

هەبی باغێ جوان شەوقی هۆری پێکێ قاتی شنداغگەلی دارگەلی. هەبی پسکێ نەخشین و کافتەرێ چەرمە و ئاسیێ بەلەک. پسک فرا چەلاش کەواستە خۆش بی، و کافتەرەکە چەلاش پەستە واتە خۆش بی چمان دارگەلی ئاسیچێ چەلاش گر واردە چمان گولگەلی خۆش بی. بەلێ فرا دلهورد بیشان چنکی دەنگزێ ئایی هبی چمان باغی ئو ئی دەنگز فرا پیس بیە بی هینی گەندەلخە خەلکی.

رۆیێ قسەشان کەرد بە ئیکێ گیشتشان کی دەنگزی تازە کەرا. کافتەر فڕا چۆرۆ سەری باغی ئورزا گر بۆرۆ ئو گال بدۆ ئو باچۆ: "هەرکێ مەشنەوۆ دەنگم چما ئی باغی بلا بەیۆ یاریمان کا تازە کەرمێ دەنگزی ئایی." چقە ونەکی ئەشنەفتش دەنگی کافتەری ئەما یاریشان. پسک بەدەم تازە کەرێ. ئاسی بە شاغ و پا تازە کەرێ. هەرۆشە ئورزا زمێ بکەنۆ ئەلا دار کالتەی. سپە ئەما ئورزا دار بکالۆ. شێر چنی هرچ چقە تشتێ سەنگی هەبی ئورزایا ئورداراش ئۆرناش دیری دەنگزی ئو گر بە گری دەنگزی گیشتشان کەرد بە گول و ریحان. گیشت بە ئێفتەرۆ بە ئێک دلێ یاری ئێفتەرشان دا. باغەکە و دەنگزی ئایی چمان تازۆ و جوانۆ بی ئەلا گیشتشان کی چمان بیژیوا بە خۆشی.

کی خلاسشان کەرد، کافتەر قوپێ ئای دەنگزش وارد چنکۆ ئایی دەنگزی تازۆ بی ئەلا واردەی. ئو نەقە ئاسی، پسک و کافتەر ئورزایا دەستشان کەرد بە کەواستە چە گر بە گری دەنگزی چما گول و ریحانی و کێف بیشان فرا.

ئی سوحبەت ئۆکارمان مەکەرۆ کی یاریدا فرا خاسا ئەلا گیشتی ئو ئادەم میاقەتی داروباغی ببۆ فرا خاسا.